Tvöfaldur regnbogi yfir gullpotti ársins: Ytri Rangá. Hæsta heildarveiðin, hæsta veiði á stöng yfir vertíðina.
Metveiði og metveiði ekki, hvað segja veiðitölur nákvæmlega um veiði á stöng? Þá hækkar Laxá á Ásum sig upp, Norðurá hrapar um mörg sæti en ekkert breytir stöðu Ytri Rangár - hún er efst með 641 lax á stöng eins og staðan er í dag. Næst kemur Eystri Rangá með ,,aðeins" 353, en haldið ykkur fast, í þriðja sæti er Haffjarðará og svo koma Langá og Elliðaárnar. Fleira athyglisvert kemur í ljós...
..í úttekt hjá www.angling.is. Blanda er fyrir neðan Fnjóská með 57 laxa á stöng í sumar á móti 59 hjá Fnjóská, en þrátt fyrir að Laxá í Aðaldal hækki veiðitölur sínar mikið í ár er afli á stöng aðeins 68 laxar, eða nærri 10% af því sem Ytri Rangá er með. Elliðaárnar eru hærri en Selá í Vopnafirði (!) og Flókadalsá er hærri en Norðurá, Grímsá, Þverá og Laxá í Leir, sem allar eru fyrir neðan hana þegar taldir eru fiskar á stöng.
Laxá á Ásum er í 8unda sæti þrátt fyrir hrap í veiði í sumar, því aðeins er veitt á 2 stangir.
Þetta eru athyglisverðar tölur, en ekki aljörlega réttar því sums staðar er stangafjöldi breytilegur og þá er tekið meðaltal. Einnig vita veiðimenn að meðaltal sumarsins segir ekki til um veiði á jaðartímum; Ytri Rangá hefur að undanförnu gefið vel yfir 10 laxa á stöng á dag, svo einhverjir fengu ekki ,,sinn skammt" á meðaltalstöflunni - eins og lög gera ráð fyrir.
Fróðegt væri að sjá tekið saman hvað laxinn kostar að meðaltali í hverri á! Þar er ólíku saman að jafna en skiptir auðvitað miklu máli fyrir veiðimenn, því spyrja má hvað má veiðivon kosta? Það er ekki ólíklegt að Elliðaárnar hækki sig þá talsvert á listanum, yfir hagstætt verð á laxi pr. stöng, en fróðari menn um verð veiðileyfa í helstu ám verða að gefa sig fram með þá útreikninga.
Taflan er á www.angling.is
Myndin er frá áhöfninni á Farsæli, sem reyndi við Ytri Rangá, efra svæði, og fékk lítið! Einn lax!
LEIT