|
Það var mikil tilhlökkun og eftirvænting sem fylgdi því að renna í hlað í veiðihúsinu við Grímsá í fyrsta sinn, en veiðivonin dofnaði heldur þegar litið var í Veiðibókina. Hollið á undan hafði fengið fjóra laxa á tveimur dögum! Ekki var það nú mikið. Í veiðihúsinu hittum við Þorkel Fjeldsted frá Ferjukoti sem þekkir ána eins og lófann á sér. ? Enda verið á bökkum hennar í 60 ár. Slíka menn spyr maður ráða áður en haldið er til veiða. ? Og svarið kom: lítið svart, kasta vel niður fyrir sig og draga löturhægt. En heldur þótti honum ástandið slæmt og lítil veiði, enda afar lítið vatn í ánni og þurrt og bjart veður.
Veitt var seinni part föstudags, laugardag og hálfan sunnudag. Grímsá er afskaplega falleg á og veiðistaðir margir. Á þessum tíma vilja allir fá Oddstaðafljótið, þar er mesta vonin og reyndist sá staður gefa mest. Reyndar var fiskur stökkvandi á flestum svæðum. Svæði þrjú (Arnþórsholtshylur-Neðri Gullberastaðastrengur) var þó heldur dapurt og þar sást varla fiskur. Önnur svæði sem gáfu fisk: Efra Garðafljót, Strengir, Grafarhylur, Klöpp, Kotakvörn, og Laxabakkar.
Einn af veiðimönnum fékk fjóra laxa og tóku þeir allir sömu fluguna, útgáfu af Blue Charm, stærð 14, vel loðin af íkornahárum en hún var orðin ansi tætt í lokin. ? Því það var sama eintakið sem gaf alla laxana. Sun Ray Shadow gaf fjóra fiska. Aðrar flugur sem gáfu fisk voru meðal annars Collie Dog og Black and Blue.
Og þegar allt bregst verður að særa fiskinn upp. - Eftir fisklausan morgun síðasta daginn greip einn í hópnum til þess ráðs að ?Sun-Reyja? Efstahyl með stæl og látum. Kasta, strippa stutt og kasta aftur... stefnan var sett á 20 tilraunir. Í ellefta kasti tók hann loksins, örugglega orðinn brjálaður af pirringi.
Laxveiði er dýrt sport og 15 laxar á 8 stangir í 2 daga í holli sem er að mestu skipað vönum veiðimönnum sem gjörþekkja ána er heldur rýr afli. ? En ævintýrið sem felst í því að fá að veiða í svo fallegu umhverfi er jafn mikið eftir sem áður. Og þegar upp er staðið spyr maður hvort það sé ekki bara heppnin sem ræður því hvort maður fær fisk eða ekki ?
SSH | 
LEIT