Selsland í Brúará fellur oft í skuggann á Spóastaðalandi í umfjöllunum ána. Þetta er mörgum óskiljanlegt þar sem land
Sels hefur svo mikið upp á að bjóða.
Svæðið er töluvert langt, eða um 5 kílómetrar. Í rauninni mætti segja að þetta sé 5 kílómetra samfelldur veiðistaður þar
sem fiskur getur leynst í hverjum krók og kima. Í Brúará fyrir landi sels er marga fjölbreytta veiðistaði að finna.
Fossar, flúðir, brot, pyttir, breiður og strengir. Allt er þetta til staðar.
Í Brúará er sterkur bleikjustofn eins og mörgum er kunnugt, hún getur verið mjög væn og er meðalþyngdin á svæðinu 2-3 pund.
Þær eru þó til stærri. "Bleikjan getur verið gríðarlega stór, sjálfur hef ég fengið bleikjur upp í 63 cm í mjög góðum holdum.
En mun stærri hef ég séð og misst." segir Árni.
Falleg aprílbleikja sem Árni veiddi.
Urriðastofninn í Brúará hefur farið hratt uppá við síðast liðin ár og getur hann verið mjög vænn. Urriðinn er ekki jafn dyntóttur og bleikjan oft á tíðum og tekur frekar straumflugur.
"Ég varð var við stóra urriða í fossinum dynjanda núna í sumar, gríðarlega árásagjarnir og skemmtilegir að eiga við." segir Árni
Hér má sjá 63cm urriða sem tók pheasant tail #16 undir leiðsögn Árna, ekki slæmt að fá svona fisk á þrist!
Flugurnar sem Árni nefnir eru á borð við Pheasant Tail, Mobuto, Héraeyra, Friskó, Alma Rún og Peacock fyrir bleikjuna. Fyrir urriðann talar hann helst um Dýrbít og Nobblera. "Að hafa vott af óranslit í flugunum getur verið gríðarlega öflugt." bætir Árni við.
Við þökkum Árna kærlega fyrir upplýsingarnar.
LEIT