Veiðin í Rangánum er varla hafin fyrir alvöru, enda árnar þekktar síðsumarár sem gefa oft góðan afla langt fram eftir hausti. Laxinn er hins vegar mættur, að minnsta kosti í Eystri-Rangá og það töluvert upp með ánni. Veiðimenn sem þar voru við veiðar á föstudaginn settu í nýgengna 5 kílóa hrygnu við Heljarstíg upp á svæði 8. Fréttir herma að annar lax til hafi veiðst þann sama dag.
Veiðimenn eru almennt ánægðir með laxveiðina það sem af er sumri en fróðlegt verður að sjá til hvernig næstu dagar og vikur þróast þegar veiðin verður komin á fullt.
Á meðfylgjandi mynd, sem fengin er af ranga.is má sjá veiðimann glíma við lax í Klakhúshyl í Eystri-Rangá.
-þgg
LEIT