Í tilboði Stangaveiðifélags Reykjavíkur um leigu á Laxá í Mývatnssveit er tekið sérstaklega fram að gæta eigi að hagsmunum gamalgróinna Laxárvina. Ekki hefur enn verið ákveðið hvort eða hvernig áin verður leigð út, en flugur.is hafa fengið góðfúslegt leyfi formanns SVFR til að birta það sem segir um þetta mál í tilboði félagsins:
?Fjölmargir veiðimenn hafa tekið ástfóstri við Laxá í Mývatnssveit og Laxárdal, þar á meðal margir mætir félagsmenn í SVFR. Í sumum tilvikum hafa veiðimenn veitt þarna til margra áratuga. SVFR mun að sjálfsögðu koma til móts við gamla og góða viðskiptavini og tryggja þeim aðkomu að svæðinu og gera þessa yfirfærslu sem sanngjarnasta, ef af verður.?
Í Flugufréttum síðasta föstudag var skýrt frá því að fundi Laxárfélagsins hefði verið frestað vegna formsatriða og því ekki dregið til úrslita í málinu. Fundur er boðaður 26.júní.
Á vef SVFR er umfjöllun Flugurétta um málið harðlega gangrýnd. Reyndar er þar fjallað um margvíslega umfjöllun fjölmiðla, meðal annars RÚV, þar sem Haraldur Eiríksson ritstjóri www.svfr.is telur mjög á félagið hallað.
Að því tilefni birta flugur.is hér með yfirlýsingu frá Stefáni Jóni Hafstein aðalritstjóra og eiganda:
Í umfjöllun Flugufrétta sl. föstudag voru gerð þau leiðu mistök að birta vangaveltur gamalgróinna Laxárvina um áform SVFR vegna hugsanlegrar leigutöku Laxár í Mývatnssveit án þess að kanna frekar afstöðu félagsins. Þetta voru leið mistök sem við hörmum.
Niðurlag greinar, sem fjallaði um frestun fundar landeiganda, var svona:
,,Sem kunnugt er stendur val veiðifélagsins á milli Orra Vigfússonar og SVFR. Sá háttur hefur verið hafður á við Laxá að þeir sem stundað hafa svæðið, og haldið tryggð við það árum og jafnvel áratugum saman, hafa notið ákveðins forgangs við úthlutun og nú velta menn því fyrir sér hvernig færi fyrir þeim ef SVFR fengi ána. Úthlutunarreglur félagsins bjóða auðvitað ekki upp á það að einn félagsmaður njóti forgangs umfram aðra, menn ávinna sér engan rétt og allir sitja við sama borð eins og í öllum góðum félögum. En líklega þætti gömlum vildarvinum Laxár það heldur súrt í broti að geta ekki lengur gengið að dögunum sínum vísum.?
Eins og sjá má í frétt hér að ofan hefur félagið þvert á móti tilkynnt landeigendum að það muni koma til móts við gamalgróna vini Laxár. Fordæmi munu fyrir því bæði er varðar Hítará og Leirvogsá. Flugur.is harma að ekki var gengið úr skugga um þetta fyrir birtingu fréttarinnar og þykir leitt að hafa valdið SVFR vandræðum vegna þessa. Ritstjóri Flugufrétta hefur þegar beðið formann SVFR afsökunar á klausunni.
Vegna skrifa ritstjóra SVFR á vef félagsins verður þó að taka fram að flugur.is geta ekki svarað fyrir aðra fjölmiðla eða það sem fer fram á bak við tjöldin þar sem greinilega er mikið rót á mörgum. Flugur.is hafa alltaf leitast við að segja sem sannast og réttast frá því sem gerist í heimi veiða og stæra sig af því að vera óháðar sérhagsmunum. Sú stefnumótum SVFR sem kemur fram í því að vilja koma til móts við góðvini Laxár ef félagið leigir ána telst því til tíðinda sem flugur.is hefðu mjög gjarnan viljað koma á framfæri við lesendur sína samkvæmt ritstjórnarstefnu sinni. Þessi mistök eru því hörmuð, en um leið tekið fram að það er fráleitt að gera því skóna að vefurinn taki þátt í rógsherferð á hendur SVFR. Satt að segja hefur samstarf okkar á flugur.is við SVFR alltaf verið með miklum ágætum og munum við leggja metnað okkar í að svo verði áfram.
Virðingarfyllst
Stefán Jón Hafstein.
LEIT